|
「第一次買樓，無戒備心要去防人。因為呢間是一間好大的地產代理公司…無諗過原來大型公司隨便地氹啲客去買，甚至是呃我哋去買。未買過樓，原來咁多程序。」且已計過現有200萬元，付首期後仍有約30萬元後備資金，月供約2.1萬元，職業穩定，兩公婆短期不算生育，當時美聯物業經紀梁又斬釘截鐵話「做咗咁多年」，信他的經驗，沒料到後來出爾反爾。
80後新婚首置客700萬元買大圍新盤薈蕎1房戶，惟發展商提供按揭公司不批八成按揭，最終撻定損失逾36萬元。及後向一手銷監局及地監局投訴美聯物業經紀落定前實牙實齒表示「一定可造8成按揭」惟最終不批，以及教唆偽造文件，務求讓已退休無收入的外父成為按揭擔保人，並委聘律師循民事訴訟追討賠償。地監局已正展開調查。
80後買家新婚後欲置業，數月前途經尖沙嘴被經紀游說購買宏安(1243)沙田大圍新盤薈蕎，儲蓄多年達200萬元，相信有能力置業，最後被屋苑綠化環境及交通便利吸引。他接受訪問表示，街頭經紀介紹認識該行經紀梁，之後帶到薈蕎售樓處，第一天經紀梁表示代客墊支一半留住單位，當時已經晚上8時多未決定。
翌日再回售樓處，當時向美聯物業經紀梁表示：「我哋提及入息3萬頭，佢(經紀)話呢個無問題，話介紹按揭公司俾我哋，會幫我哋做到八成按揭……但我哋最擔心做唔做到8成按揭，然後佢話實做到啦，點會做唔到，呢個無問題，仲有咩好考慮。其實我哋表明咗好幾次，擔心呢樣嘢，佢當時睇我哋入息，係度計數，計計下話ok…無問題啦…實牙實齒話無問題。」他補充，期間身份證被取以作留單位之用，甚至去廁所小便，經紀B都企在隔離，即使老婆要去廁所，作為男性的經紀梁也稱要陪伴，即使說是女廁，也要在廁所外守候。
之後購入一個實用389方呎一房戶，成交價720萬元，臨約定金逾36萬元。從未買過樓，但都有計過數，「如果做到8成按揭，係供得起。首期連雜費約170萬，我哋有200萬，仲有30萬流動資金去應付突如其來的事，唔會供唔到一個月就拜拜。我哋有準備，借8成月供2.1萬，兩公婆節食縮食，而家一個月都駛唔夠一萬，每個月都有剩。」
簽臨約後要求經紀梁提供按揭公司聯絡方法，但遲遲未覆，直到簽約翌日才提供聯絡方法。及後該按揭公司致電回覆表示，8成按揭月入須達5.2萬元。他感到突然：「完全無諗過同經紀講嘅嘢咁大出入。如果一開始話要五萬幾入息，就知道唔使諗啦，唔使簽約！追問經紀梁：『之前又話做到8成嘅？』跟住佢話無講過。咁就知大鑊啦！個陣無戒備，無證明佢有咁講過，覺得好似中圈套。」
到經紀梁代理行算賬，再轉介另一名經紀林，經紀林教唆他們偽造文件，將外父自住單位出租給他老婆，令已退休外父有收入，藉以符合擔保人的資格，今次有備而來，整個過程錄音。他表示：「好奇怪，似呃人，照咁做，如果犯法越踩越深……唔想一錯再錯。」
最終無理會經紀林的建議，惟時間急逼，籌不到錢便撻定，他皺眉道：「當時好無助，唔知應該同邊個講，屋企人都已經做唔到擔保人，我哋係得咁多，突然要嘔多一百幾十萬，屋企人都幫唔到自己。朋友？香港地每個人都想買樓，佢地都未買樓，又點會幫我買樓呢。最後撻定，好失望，辛苦儲咁耐嘅錢，一下子俾人整走咗。」
美聯物業回應，就上述個案，據悉，公司職員已向客人提供按揭及壓力測試資料供參考，而發展商亦有提供不同類型按揭計劃，但一切仍需以銀行或發展商批核作準，而客人是在簽臨約翌日便決定自行取消交易。另外，公司職員未有就是次個案提供違規建議。美聯重申重視員工操守，如發現有任何違規行為，會嚴肅處理。
| 
